Актывіст чакае адказу ад ідэолага

Каардынатар Руху "За Свабоду" па Гомельскай вобласці Уладзімір Кацора паведаміў пракурору вобласці і яе кіраўніцтву пра ігнараванне ідэолагам Гомельшчыны зваротаў грамадзян.

Уладзімір Кацора звярнуўся ў пракуратуру вобласці і да намесніка старшыні аблвыканкама Пятра Кірычэнкі з патрабаваннем прымусіць кіраўніка галоўнага упраўлення ідэалагічнай працы аблвыканкама Анатоля Кацілу адказаць на пісьмовы зварот актывіста.

Яшчэ 5 студзеня бягучага года сп. Кацора напісаў галоўнаму ідэолагу вобласці заяву, каб той даслаў копію рэкамендацый Гомельскаму гарвыканкаму аб распрацоўцы прыкладных узораў дакументаў, неабходных для падачы ў выканаўчыя органы пры правядзенні масавых мерапрыемстваў, бо шмат разоў чыноўнікі райвыканкама не дазвалялі праводзіць акцыі, па прычыне нібыта няправільна аформленых дакументаў. Прайшло ўжо некалькі месяцаў але адказ ад сп. Кацілы так і не прыйшоў.


Гэта і стала падставай для звароту ў адпаведныя інстанцыі. "Прашу абявазаць начальніка галоўнага упраўлення ідэалагічнай працы Гомельскага аблвыканкама накіраваць у мой адрас копію рэкамендацый…, а таксама даць прававую ацэнку яго дзеянням (бяздзеянню) па факту пакідання зварота грамадзяніна без разгляду па сутнасці ўзнятага пытання", – гаворыцца ў заяве.