Літоўцы пайшлі шляхам Вітаўта

Удзельнікі праекту "2000 кіламетраў гісторыі" вырашылі паўтарыць паход князя Вітаўта да Чорнага мора 600-гадовай даўніны і выправіліся ў 40-дзённы паход на конях. Сярод вершнікаў – літоўскія бізнесоўцы і палітыкі, а на чале экспедыцыі віцэ-мэр Вільні.

Праект "2000 кіламетраў гісторыі" арганізаваў літоўскі бізнесовец, уладальнік замку ў Нарвілішках каля самай беларускай мяжы Гедрыюс Клімкявічус. На яго задуму, 10 вершнікаў цягам 40 дзён мусяць праехаць шляхамі князя Вітаўта з Трокаў (Літва) праз Навагрудак у Ачакаў (Украіна). Усяго шлях складае 2000 кіламетраў. За дзень вершнікі праходзяць 50 кіламетраў. Цікава, што ачольвае экспедыцыю віцэ-мэр Вільні Гінтаўтас Бабравічус.

"Такім чынам мы хочам па-новаму зафіксаваць наша супольнае гістарычнае мінулае", - кажа Гедрыюс Клімкявічус. Разам з вершнікамі ў вандроўку выправілася і здымачная каманда – падчас паездкі па Літве, Беларусі і Украіне плануецца стварыць дакументальны фільм пра спадчыну ВКЛ і прадставіць яго ў трох краінах.

14 верасня вершнікі дабяруцца да Навагрудка, дзе іх будзе сустракаць міністр культуры Павел Латушка, мэр горада і пасол Літвы ў Беларусі.