Куллінковіч адзначыць Дзень нараджэння канцэртам

Лідэр гурта Аляксандр Куллінковіч адзначыць свой Дзень нараджэння вялікім сольным канцэртам. Музыкант вырашыў сабраць разам на сцэне музыкаў, з якімі працаваў у апошнія гады.

"18 мая ў мяне Дзень нараджэння. Чым не нагода выйсці на сцэну і сабраць разам тых людзей, якія граюць са мной", - кажа Аляксандр Куллінковіч. Яго гурт Neuro Dubel у Беларусі знаходзіцца пад негалоснай забаронай. Канцэрт-прэзентацыя трыб’юта каманды ў сакавіку была сарваная, у сувязі з чым музыкант публічна папрасіў міністра інфармацыі Алега Праляскоўскага даць тлумачэнні, а таксама выступіў з адкрытай заявай, у якой зазначыў, што ўлады фактычна наклалі забарону на прафесію рок-музыканта ў Беларусі. Афіцыйнай рэакцыі з боку ўладаў не было.

18 мая Куллінковіч хоча сабраць музыкантаў, з якімі грае, і сваіх прыхільнікаў у адным з мінскіх клубаў (зараз вырашаецца пытанне ў якім менавіта), каб паспяваць свае старыя і новыя песні. Аляксандр спадзяецца, што розум пераможа, і аніякіх перашкодаў улады чыніць не будуць.

Пры канцы красавіка ў Брэсце і Гродна паспяхова прайшлі сольныя канцэрты Лявона Вольскага, хоць выступ яго гурта "Крамбамбуля" у Мінску быў забаронены.